Зад брендот „Пинкгифт“ стои Анастасија Ѓурчиновска – студентка на Технолошкиот факултет која успева да ги спои научното знаење и креативниот дух во социјален бизнис за свеќи. Користејќи го своето разбирање на хемиските и технолошките процеси на производство, таа создава рачно изработени миризливи свеќи од еколошки восок, претворајќи ја науката во топлина, атмосфера и уметност.

Во текот на Програмата за Сонувачи, нејзината идеја доби нова, поодржлива димензија. Наместо класични садови, Анастасија започна да им дава нов живот на заборавени предмети - кристални сервиси, стари чаши, стаклени садови и други уникатни парчиња кои преку нејзината работа повторно стануваат дел од нечии домови. Нејзините свеќи се украсени со внимателно одбрани детали, како исечоци од стари фармерки и други реупотребени материјали, а во моментов работи и на развој на еколошки решенија за нивно пакување.

Посебен дел од нејзината визија е создавање систем со речиси нула отпад. Наместо садовите да завршуваат во отпад по трошењето на свеќата, клиентите ќе имаат можност да се претплатат на месечно дополнување на своите омилени свеќи. На тој начин, истите садови ќе можат повторно и повторно да се користат, намалувајќи ја потребата од нови материјали и создавајќи поодржлив начин на консумирање на производите.

„Пинкгифт“ е идеја да се внесе повеќе боја, топлина и радост во секојдневието. Анастасија верува дека современиот свет станува сѐ посив, побрз и поедноличен, а нејзините производи се мал потсетник дека убавината често се крие во деталите. Со своите внимателно изработени свеќи, таа создава предмети кои не само што внесуваат пријатен мирис и атмосфера во домот, туку и раскажуваат приказна за креативноста, одржливоста и повторното откривање на вредноста во работите што веќе си ги имаме.

Преку „Пинкгифт“, Анастасија покажува дека науката и уметноста не се спротивности - туку совршени сојузници во создавањето поубав, поодржлив и порозев свет.